ሓበሬታ ንኽልኹም ኤርትራውያን ደለይቲ ለውጢ ተቐማጦ ሃገረ ስዊድን ስቶክሆሎምን ከባቢአን

ብምኽንያት  24  ግንቦት  መዓልቲ  ናጽነት  ኤርትራ  ህዝብና  ነቲ  ብመስዋእትን  ስንክልናን  አሽሓት ደቁ  ህያው  ዝኾነ  መዓልቲ  ናጽነት  ንምዝካር  አብ  ዝሸባሸበሉ  ዘሎ  ግዜ  በቲ  ካልእ  ወገን  ድማ  ባህግናን  ትምኒትናን  ተጨዊዩ  ኤርትራዊ  አብ  ገዛእ  ሃገሩ  ሰብኣዊ  ክብሩ  ተገፊፉ  አደዳ  ግፍዕን  ማእሰርትን  ስደትን  ብምኻን  ንኽትሰምዖን  ንኽትሪኦን  ዘሰንብድ  ጭካነ  ዝመልኦ  አዚዩ  ዘስካሕክሕ  ግፍዒ  አብ  ልዕሊ  የሕዋትናን  አሓትናን  ክወርድ  አብ  እንዕዘበሉ  ዘሎና  እዋን  ናይ  እዚ  ኩሉ  ስዕቤን  ጠንኪ  ድማ  እቲ  ኮረሻ  ስልጣን  ጨቢጡ  ብሓይሊ  ዝገዝእ  ዘሎ  ሰብ  መሰል  አራዊት  ስርዓት  ህግደፍ  ምኻኑ  ሎሚ  ካብ  ዝኾነ  ፍጡር  ዝተኸወለ  አይኮነን።

ስለዚ  ኩሉ  ኤርትራዊ ነቲ  ን21  ዓመት  ድሕሪ  ናጽነት  ንህዝብና  ብዘይ  ንሕስያ  መዘና  አልቦ  ግፍዕን  ጭቆናን  ዘውርደሉ  ዘሎ  ስርዓት  ብሓባር  ይአክል  እንብለሉ  ግዜ  ስለዝአኸለ  ኩሉ  ኤርትራዊ  አብ  መላእ  ዓለም  ዘሎ  በዛ  ታሪኻዊት  መዓልቲ  አብ  ቀጽሪታት  ቤትጽሕፈትን  ኤምባስታት   ህግደፍን  ድምጺ  ውጹዕ  ህዝብና  ንምስማዕ  ብዓውታ  ዝጭድረላ  መዓልቲ  ክትከውን ተወሲና  ስለዘላ፡  ንሕና  እውን  አካል  ናይዚ  ሕብረተሰብ  ስለዝኾና  አብ ስቶክሆሎምን  ከባቢአን  እንርከብ፡

ንዕለት  25  ግንቦት 2012

ሰዓት  13.00–16.00

ቦታ፡  ኤምባሲ  ኤርትራ  ስቶክሆሎም/Lidingö

ሰለማዊ ሰልፊ  ክንገብር  ምኻና  ብአኽብሮት  እናዓደምና  ኩሉ  አብ  ፍትሕን  ሰብኣዊ መሰልን  ግዝአተ ሕግን  ዝአምን  ድማ  ምሳና  ሓቢሩ  ክውዕል  ተሪር  ምሕጽንታ  ነቕርብ።

ቀጺልና  ንዝኽርን  ክብሪን  ንታ  ከቢድ  መስዋእቲን ስንክልናን ዝተኽፍለላ  24  ግንቦት  መዓልቲ  ናጽነት ኤርትራ፡ ምስ  ኩሎም  መሓዙትን  ፈተውትን  ሓቢርና

ቀዳም 26  ግንቦት 2012

Time ካብ  ሰዓት 18.00 –03.00

Place: Omega Resaurant-Armegatan 40- T- bana Västraskogen

ናይ ወጋሕታ  ዝተፈላለዩ  መደባት ከም ፓነል ዝርርብ  ከምኡ  እውን  ንዝኽሪ  መዓልቲ  ናጽነት  ዘንጸባርቑ  ሓያላት ስነጥበባውያን  ከዘናግዑና  ተቐሪቦም  ከምዘለዉ  እናሓበርና  ምሳና  ሓቢርኩም  ክትዘናግዑ  ደጊምና  ብኽብሪ ንዕድም።

ኣዳለውቲ

ሕብረት ኤርትራውያን/SESADU ምስ ማሕበር መንእሰያት ኣብ ስቶክሆልም።

ብድሓን ምጹ

ንሕና አባላት ተቃዉምቲ ንደሞክራስያዊ ለዉጢ አብ ኢንዲያናፖሊስ ኢንዲያን እንርከብ ነቲ ንዕለት 25 ሚያዝያ 2012 ዓ.ም አብ ዋሽንግተን ዲሲ አብ ኤምባሲ ወኪል ግፍዔኛ ስርዓት ህግደፍ ብሃገሮምን ህዝቦምን ግዱሳት ኤሪትራዊያን ምስ መንእሰያት ብምትሕብባር ዝተወዳደበ ሰፊሕ ሰላማዊ ሰልፊ እንዳሞገስና ብሓሳብ ይኩን ብአካል አብ ዝተዓጠቁምሉ ዕጥቂ ምሳኩም ዓቲቅና ክንዉዕል ሙኻና እንዳራጋገጽና ነቲ ሲዕቡ ንዕለት 26 እትገብሩዎ ናይ ክልተ አካላት ሓድነታዊ ምትሕንፋጽ መንእሰያት ሰሚናር እንዳ ናአድናን አሞጎስናን ስርዓት ህግደፍ ካብ ሱሩ ንምምዉሓዉ ብሓይሊ ቃልስ ጥራይ ከም ዝወርድ አሚንኩም ኩሉ ቆላሕታኩም ቀዳምነት ዕጥቁኩም ንምድሓን ህዝብን ሃገርን ክከዉን ንላቦ። አጀኩም አብ ምድሓን ህዝብን ሃገርን አብ ጎድኑኩም አሎና።

ዓወት ንቃልሲ ዉጹዕ ህዝብና

ዓወት ንሓድነታዊ ምትሕንፍጻዊ ሰሚናርኩም

ዉድቀት ንህደፍን ኮራኩሩን

አጀኩም ክንዕወት ኢና።

አባላት ተቃወምቲ  ንደሞክራስያዊ ለዉጢ ኤርትራ

ኢንዲያናፖሊስ, ኢንዲያና

ክኾነለይ ኢልካ ጸላም ተቐንጢጡ ብርሃን ኣብ ደምበኻ ክደምቕ

ብስማካ ፈልሲ ተተኺሉ ኣብ ቀጽሪ መቓብርካ ከጉላዕልዕ ክጸድቕ

ማዕረ-ማዕሪኡ ‘ውን እቲ መሻግርትኻ ውጹዕ ህዝቢ ኣብ ራህዋ ኮይኑ፣

ስለ ዓጽመ-ደምካ ከመስግን ክምርቕ

እታ ብነጠብጣብ ደምካ ዝተጻሕፈት ሓረግ ናይ ለበዎ

ምስላ ጠፊኡና ናይ’ቶም ጠለምትኻ ነብሰ-ፍትወት ዓብሊልዋ

እቲ ደምካ እናዛረየ መሬት እናጨቀወ

ኣብ ኣፍ ሞት እናተስሓግካ ገጽካ ናጸምለወ፣

ሰሚዕናዮ ሕድርኻ ሕድሪ ራህዋ ሕድሪ ማዕርነት

ሕድሪ ሰላም ሕድሪ ናጽነት

ኣይትርኣዮ ገንሸል፣- ኣርዑት ባዕዳውያን ንስኻ ሴርካዮ

ኣርዑት ደቂ ሃገር ንሕና ተቖሪንናዮ

ኣይትርኣዮ ገንሸል፣- ምዝማድ ኣብዩና ሕድርኻን ድሕሬኻን

ጽዖት ከየሕወና ቅያር ቆራቑሮ ደጊም ናብ ክሳድና

ኩነተ-ባርነት ክኽሰት ብደቂ ማህጸንና

ቅዱስ ሕድርኻ ክንትግብር እናተሃንጠና

ዘራግ ማይ ኣብ ከብዲ ዓድና

ምጻሩ ስኢንና ከም ደቂ ዛግራ ፋሕ ጽንግራሕ ኢልና።

ኣይትርኣዮ ገንሸል፣- ወለድኻ ክልተ- ሳዕ ክሓዝኑ

መስዋእትኻ ከጣዕሶም ክንዲ ዝሕበኑ

“ብላሽ ደም ወድና ፍሪኡ’ዚ ተኾይኑ”

ከስተማስሉ ክሽቑረሩ ክሳዶም ከድንኑ

ኣይትርኣዮ ገንሸል፣- ጅሆ መንእሰያት ኣሕዋትካ

ማኣዲ ጸምዩዋ ሸውሃቶም ትዓጽዩ ስድራኻ

ቤትካ ቃዚና ግዒዛ ንበረኻ

ናትካ’ዶ ኣይምኣኸለን ዘልኣለም ምጥፋእኻ

ኣይትርኣዮ ገንሸል፣- ነቲ ኣውያት ስቓይ ኣውያት መሰል ምግሃስ

ጥርዓን ጽምኢ ፍቕሪ እህህታ ዓጸቦ ህዝብኻ እንተትሰምዖ

ዋላ ብመንፈስካ ተተቃልብ ኣዴታትካ ነቲ መስዋእትኻ ምስተነግረን

ሓበንና፣ ናጽነታን” እናበላ ብኽያተን ዝውሓጥኦ፣

ሎሚ ብጠላማት ጉጅለ ክብረን ምስተጋህሰ፣

ሕሳስ ልደ ወደን ክንዲ ዝድብሰን ምስተመልዓሰ

ምተዓዘብካየን ሕጂ ክነብዐኦ።

ኣንታ ገንሸለይ ክምሕጸነካ’ዶ፣

ነዚ ከዳዕ ጉጅለ ንመንእሰይ ዘጽሃዶ

ርሃጽ ደም ህዝቢ ዘሰወዶ

ሹኽ ክትብለልና ንስኻ ምስ ሓመድ ምውሳብካ

ንህዝቢ ክጥዕሞ ድኣ’ምበር ከምዘይኮነ መሊሱ ክገዶ

ንስኻ’ውን ብመንፈስ ከም ዝተሳቐኻ ምፈለጠ’ሞ ምተሰወጦ’ዶ?

ምዃን ክኣ ህዝብና ቓዚኑ

መንእሰይ ዓዊኑ መጻኢኡ ጸላም ተሸፊኑ

ቕሊጽበት’ዩ ‘ምበር ማዓስ ጠፊእዎ፣ ‘ቲስቓይና ቃንዛኻ ሙዃኑ

ዘይንዓኻስ ጎሲካ እንድኣሉ ገንሸለይ ድሕሬኻ ምዓስ ጥዒሙ

ብውልቀ-መለኽቲ ቃልካ ተወንዚፉ እንሆ ጠሚሙ

ህዝብና ስቓይ ምስዓጸቦ እናካፈየ ሞት ሕጹይ ኮይንዎ

ጥልመት ደቂ ቤቱ ምስ ቃሎምን ቃልካንን ምዝማድ ኣብዩዎ

በል መንፈስካ ልኣኮ ኣይትትሃመል በሎ

ጻምኡ ክደሊ ንገሮ ምዕምጻጽ ይኣኽሎ፣

ዓይነታ

ናይ መጠረሽታ ድግስ ህ.ግ.ደ.ፍ. ኣብ ትንቢት ዘይኮነ ኣብ ክውንነት ተሞርኪሰ እየ ዝጽሕፎ ዘለኹ፡፡ብኡ መንጽር ኣብ ኩሎም ፍትሒ ይንገስ ምልኪ ይፍረስ ብምባል ቆሪጾም ዝተላዕሉ ደለይቲ ዲሞክራስዊ ለውጢ ውጹዓት ኣማን ብኣማን ሓቂ ዝብል ነጎድጓዳዊ ድምጺ ከም ዝስማዕ ርግጸኛ እየ፡፡ኣብቶም ገለ ከምቲ ሜጀር ጀነራል ገረዝጊሄር ዓንደማርያም ውጩ ኢልዎ ዝበሃል፡ “ወዲ ኣፎርቂ ነዛ ሃገር ናብ ሃው ዝበለ ጸድፊ ኢዩ ዝወስዳ ዘሎ፡፡ነዛ ዓዲ ይሃንጻን የልምዓን ዘይኮነ ይብትናን የዕንዋን ኢዩ ዘሎ፡፡ንሕና ከኣ ምስኡ ኮይና ኣብቲ ግናይ ኢድ መሊስና ኢና፡፡ ስለዚ ጥፍኣትናን ዕርበትናን ምስኡ ኢዩ”፡፡ ዝበሎ ኢድ ዝመለሱን ኣብ ደም ንጹሃት ዝወዓሉን፡ ደም ዝተጸየቑን ዝነጠሮምን ኣጥፊእካ ጥፋእ ምርጫ ውጩ ከም ዝምእምኦም ዘጠራጥር የብሉን፡፡ እዚ ጽሑፍ እዚ ነቶም ቀንዲ ተዋሳእቲ ኣብ ሽርሕታት ህ.ግ.ደ.ፍ. ተፈራረድ ነብሰ ገርግስ ስለ ዝኾኖም ልኡኽ ወያነ ኢዩ፡፡መጋበርያ ሲ.አይ.ኤ. ኣሜሪካ ኢዩ፡፡ ብምባል ነቲ ኣብ ባይታ ዘሎ ክውንነት ደፊኖም በቲ ዝተኻሕንሉ ሜላ ካዕቦ ሓሶት ንገለ የዋሃት ከደናግሩ ክፍትኑ ኢዮም፡፡የማነ ጸጋም ዝዕቆቡሉን ዝሕብኡሉን ካልእ ስለ ዘየለ ክሳብ እታ ናይ መጠረሽታ ደቒቕ ግብኣተ መቓብር ገባቲ ስርዓት ህ.ግ.ደ.ፍ. ለኻኺሞም ምእንቲ ክጠፍኡ ንኺድ!! ንጽደፍ!! ጥራይ ከምዝጭርሑ ውን ፍሉጥ ኢዩ፡፡ይዋእ’ዮም እቶም ዘሕዝኑ እቶም እናረኣዩ ዝዓወሩን እናሰሙዑ ዝጸመሙን ሕሉፋት ደገፍቲ ህ.ግ.ደ.ፍ. ኢና ዝብሉ ኢዮም፡፡ ኣብ ዘይጭበጥ ናይ ሕልሚ ዓለም ኣትዮም እናሓርነኹ ሞት እዚ ጽዩእ ስርዓት ከም ዝተኣውየ ዘይምስመዖም ኢዩ፡፡ብርግጽ ድማ እዚ ዓማጽን ገባትን ስርዓት ሞይቱ ኢዩ፡፡ እዚ ናይ ጓይላን ዳንኬራን ድግስ ናይ መጠረሽተኦም ኢዩ፡፡መላእ ህዝቢ ኤርትራ ሓመድ ድበ ናይዚ ሞቱ ብዓውታ ዝተኣወየ ገባቲ ስርዓት ከርክብ ኣብ ትንፋስ ዘይህብ ኣዝዩ ቅልጡፍ ጉዕዞ ኢዩ ዘሎ፡፡

ሎሚ 24 ግንቦት መዓልቲ ናጽነት ኤርትራ ንመበል 21 ግዜ ብልዑል ፈንጠዝያ ንምብዓሉ ተኣንጎት ተሸብሸብ ዝበሃለሉ ዘሎ ናይ ዋዜማ ዕለታት ኢዩ፡፡ ዕስራን ሓደን ዓመታት ናጽነት ብኸመይ ከም ዝሓለፍናየን ድማ ንኹልና ዝተሰወረ ሚስጢር ኣይነበረን፡፡ህዝቢ ኤርትራ መሬታዊ ናጽነት እምበር ፍትሕን ዲሞክራስን ኣይረኸበን፡፡ኣብ ገዛእ ውራዩን ዳሱን ከም ዝተናዕቀ ፍንፉን ለማኒ ኣብ ኣፍደገ ተኾርምዩ እምበር ዋና ኣይኮነን፡፡ ካብ ምቕታልን ምእሳርን ምጭዋይን  ኣየዕረፈን፡፡ወናኒ ፖለቲካዊ ስልጣኑ ኣይኮነን፡፡ካብ ዝኸፈአ ናብ ዝገደደ መዐሙቕ ድኽነት ተሸሚሙ እምበር ምቾት ኣየስተማቐረን፡፡ዝነበረ ዋሕዚ ስደት ብዝተዓጻጸፈ ቀጺሉ እምበር ኣየዕረፈን፡፡ኣረ ኣብ ግዜ እቲ ፈደረሽን ኤርትራ ጥሒሱ ህዝቢ ዘበሳበሰ ዓድታት ዘንደደ ሃጸይ ሃይለስላሰን፡ድሒሩ በትረስልጣን ዝጨበጠ ኤርትራውያን ብሰንሰለት ታንክ ዝዓምጠቐ፡ ነፍሰ-ጸራት ኣዴታትናን ኣሓትናን ብብልሒ ሳንጃ ዝተሳህለ ፋሽሽታዊ ደርግ፡ ዘይተራኣየን ዘይተሰምዓን፡ ኣብ መበል 21 ክፍለዘመን ዓለም ዘደንጸወ ትራጀድያዊ ፍጻመ ሲናይ፡ ዝምታ ውሽጣዊ ኣካላት ኤርትራውያን መናእሰያት ናጽነት ተባሂሉ ኣብ ዝተዘመረሉ ሕጂ ኢዩ ዝፍጸም ዘሎ፡፡ሃገር ናብ ሓንቲ ዓባይ እስርቤት ተቐይራ መላእ ሕብረተ-ሰብ ኣብ ማሕቡስ ዝተዳገነ ሎሚ ኣብ ናጽነት ኢዩ፡፡ ብስም ዘይውዳእ ሃገራዊ ኣገልግሎት መላእ መንእሰይ ኤርትራ ኣብ ዘመናዊ ናይ ባርነት ስራሕ ዝተጸምደ ትማሊ ኣብ ባዕዳዊ መግዛእቲ ዘይኮነ ሎሚ ኣብ  ናጽነት ኢዩ፡፡ 21  ዓመታት ናጽነት ህዝቢ ኤርትራ ዝረገኣ ደም ንውሽጢ እናነበዐ ሓሊፍወን፡፡

ውሉድ ካብ ወላዲኡ ተፈላልዩ ተበታቲኑ፡፡ዕሸላት ቆልዑ ኣቦን ኣደን ሲኢኖም ዘኽቲሞም፡፡ መናእሰያት ኤርትራ ንምልኪ ውሑዳን ኣብ ዘርብሕ ኣብ ተደጋገምቲ ዘይምኹኑያት ኲናት ኣትዮም ሃሊቖም፡፡ ሰንኪሎም፡፡ መጻኢ ዕድላቶም ተበላሽዩ ኣይ ትምህርቲ ኣይ ስራሕ፡ ኣይ መርዓ ኣይ ደርዓ ኮይኖም ግዚኦም ንብላሽ ባኺኑ፡፡ብዙሓት ካብዚ ዘስካሕክሕ መዓት ንምምላጥ ምድረበዳ ሰሃራን ማእከላይ ባሕርን ውሒጥዎም ኣሰራቶም ጠፊኡ፡፡ቤተሰብ እዚ ኣስካሕካሒ ፍጻመ ሓዘን ከይገብሩ ከየልቅሱ ተኸልኪሎም፡፡ ዕሙራት ስድራቤታት ጸንታ ኮይነን፡፡ ዓድታት ጸምዩ ገረውረው ኢሉ፡፡ኣረ ቀባርን ወራዶ መርዓን መሰነይታ ትስእነሉ ግዜ ተበጺሑ፡፡ ትርጉም ናጽነት እንታይ ምዃኑ፡ ዝተኸፍለ መዳርግቲ ኣልቦ መስዋእቲ ንምንታይ ምንባሩን ድንግርግር ክሳብ ዝብለና ኮይኑ፡፡እቶም ንናጽነት ከም ሓርኢ ተመን ዘናደይዋ ካብ ብሱል ጥረ ኮይኖም ኣብ ዓወት ዝበጽሑ ገዳይም ተጋደልቲ፡ውዕለቶም ተጠሊሙ ማሕዩር ዒራዒሮ ሰፊሮም፡፡ካብ መጀመርያ ናጽነት 1991 ዓ/ም ኣስጋእቲ ዝበሃሉ ተጋደልቲ እናተለለዩ ካርሸልን ካልእ ስዉር እስርቤታትን ዕድመ ልክዕ ናጽነት ብዘይ ፍርዲ ተሞቒሖም፡፡ብዙሓት ካልኦት ሓታቲ ዘይብሎም ሃለዋቶም ተሸሪቡ ሓቒቖም፡፡ ኣሽሓት ኣማኢት ተጋደልቲ ድማ፡ ከቢድ ሞራላዊ ውድቐት በጺሕዎም ኣራእሶም ከምዘድንኑ ተገይሩ፡፡ጠገለ ዝሰኣነ ፍኑው ሓታቲ ዘይብሉ ጉጅለ ህ.ግ.ደ.ፍ. ንመውጋእቲ ከም ስልማት ከም ዘይ ገዓረሉን ከም ዘይ ዘመረሉን ተወጺዕና ናብራ ከቢዱና ተረሲዕና ዝበሉ ስንኩላን ኲናት ተጋደልቲ፡ ሓንቂቕኩም ብምባል ብኣድራጋ ጠያይቲ ተሳሂሉ፡፡ቅንጣብ ገበን ዘይብሉ ንጽህ ህዝቢ ምኽኒታት እናፈጠርካ ኣብ ዘስካሕክሕ እስርቤታት በልዩ፡፡ተቐቲሉ ተጨፍጪፉ ካብ ዓድታቱ ተሓግሒጉ ወጺኡ፡፡ ገለ ካብዚ በላዕተኛ ስርዓት ኣምሊጦም ኣንጻር እቲ ስርዓት ክቃለሱ ደው ዝበሉ ከኣ፡ ህዝቢ መታን ክፍንፍኖም ከዳዓት፡ ሸየጥቲ ሃገር፡ ልኡኻት ወያነ፡ መጋበርያ ኣመሪካ  ዝብል ኣነዋሪ ቅጽል ስም ተጠሚቖም፡፡ ሕድርን መብጽዓን ኣሽሓት ሰማእታት ኤርትራ ምሉእ ብምሉእ ኢሳይያስ ብዝመርሖ ሒደት መላኺ ጉጅለ ህ.ግ.ደ.ፍ. ተመንዚዑን ተጠሊሙን፡፡ብኸቢድን መሰክሕን ዘይጽወር ተግባራት ህ.ግ.ደ.ፍ. ኣብ ዘበነ መግዛእቲ ፋሽሽታዊ ስርዓት ደርግ ዝሓለፍናዮ ሂወት ይሓይሽ ንኽንብል ደሪኹና፡፡እቲ ምንታይ ደርግ ዕላምኡን ጭረሐኡን  ሓደን ፍሉጥን ስለ ዝነበረ፡፡ኤርትራ ባሕሪ ምድራ እምበር ህዝባ ኣየድልየናን ስለ ዝኾነ፡፡ካብ ዝኾነ ገዛኢ ባዕዲ ውን ፍትሒ ርህራሄ ስለ ዘይርከብ ምቕታል ምእሳር ምርጋጽ ምስዳድ ምብትታን ከም ውሁብ ወሲድናዮ፡፡ እንተ ናይዚ ናትና ዝበልናዮን ከም መሎኮት ዝኣመናዮን ሓያል ኮይኑ ንኽወጽእ ኩሉ እንትናና ዝወፈናሉን ግን፡ ስጊንጢር ፍጹም ዘይእመን ኮይኑ፡፡ንዕስራን ሓደን ዓመታት ድማ “ላም ሓዊ ወለደት” ኮይኑና፡፡

ሎሚ እዚ ድሕሪ ምፍላይ ካብ ተጋድሎ ሓርነት ኤርትራ፡ ኣብ ዕስራን ሓደን ጽንኩር ናይ ሞትን ውግእን ዓመታት፡ ብደገፍ መላእ ህዝብን ተባዕ ጅግንነታዊ ተወፋይነትን ሓፋሽ ተጋደልትን ናጽነት ዘረጋገጸ ውድብ ህዝባዊ ግንባር፡ ካብ ሕቑፉኡ ብዝወጸ እሾኽ ኣሜኬላ ጫሌዳ ህ.ግ.ደ.ፍ. ዕስራን ሓደን ናይ ባርነት ዓመታት ከም ነሕልፍ ገይሩና ኣሎ፡፡ብሕማቕ ክፍኣተ መጋብር ዝተኻሕነ መሪሕነት ውድብ ህዝባዊ ግንባር ዋላኳ ናጽነት ኣብ ምርግጋጽ ወለዶታት ዝዝክርዎ ዘሓብን ታሪኽ እንተሰረሐ፡ንፍትሒ ረጊጹ፡መብጽዓ ስዋኣት ጠሊሙ መላእ ሕብረተሰብ ኤርትራ ንባርነት ስለ ዝዳረገን ኣሽሓት ኣማኢት ንጹሃት ዜጋታትና ብዘይ ፍርዲ ስለ ዝቐንጸለን ዝሸረበን ዝኣሰረን ግን ብዝኸፈኣ ኣብ ጸሊም መዝገብ ክሰፍር ኢዩ፡፡ብዙሓት ገዳይም ተጋደልቲ ህዝባዊ ሓይልታትን ከምኡ ውን ባህርያትን ኣመጻጽኣን እቲ ውድብ ብደቒቕ ዝፈልጡ ገለ ለባማትን ብምልኪ ሓደ ኢሳይያስ ዝምእዘን ውድብ ህዝባዊ ግንባር ፍትሓውን ዲሞክራስያውን ህዝባዊ መንግስቲ ክተክል ከም ዘይክእል ብንግህኡ ኣተንቢሆምን ኣሚቶምልናን ኢዮም፡፡ ኣብ ዓዲ እንግሊዝ ኣብ ስደት ዝነብሩ ኣቦይ ሃብተማርያም ኣብርሃ 1991 ሎሚ ጸነትና ሕጂ ዘርእናን መበቖልናን ጠፈአ ኢሳይያስ ዝኸፈኣ መራሕን ቀታልን ዓማጽን ኢዩ፡፡ ምስ በሉ፡ ብዙሓት ከቢድ ጽምኣት ናጽነት ዝነበሮም ኣሕዋት  ሰብኣይ ዓቢዶም ተጸሊሎም ከም ዝበልዎም ዝሰማዕኩዎ ዕላል ኣሎ፡፡የግዳስ ብኸቢድ ጽምኣት ናጽነት ውነና ዘጥፋእናን ዝዓበድናን ዝሰኸርናን እቶም ባህርን ኣነዳድቓን ኣመጻጽኣን ውድብ ህዝባዊ ግንባር ዘይንፈልጥ ዝነበርና እቶም ብዙሓት ኢድና ክሳብ ዝደሚ ዘጣቓዕናን  ኢና፡፡ገለ ሓቅታት ዝወዓሉ ካብ ዝበልዎ ዝበልዎ ንምጥቃስ፦

ተጋዳላይ ኣድሓኖም ገብረማርያም፡ ኣብቲ ብምኽንያት መስዋእቲ ዓሊ ሰይድ ዓብደላን ወፍሪ ዋርሳይ ይከኣሎ ወፍሪ ባርነት’ዩ፡፡ኣብ ዝብል ሻምናይ ክፋል ጽሑፉን፡ ከምዚ ዝስዕብ ሓሳብ ብኑጹር ሰፊሩ ንረኽቦ፡፡ ኣብ ህዝባዊ ግንባር ክልተ ዓይነት ተጋደልቲ ኢዮም ነይሮም፡፡

1-   ጸላኢ ዝቐትሉ፡ ጸላኢ ዝማርኹ ተጋደልቲ፡፡

2-  ንኸምኦም ተጋደልቲ ዝቐትሉን ዝኣስሩን ተጋደልቲ ኢዮም ነይሮም፡፡

እዞም ኣብ ቀዳማይ ጉጅለ ዘለው ተጋደልቲ፡ንሂወቶም ከይበቐቑ ምእንቲ ናጽነት ህዝብን ሃገርን  መዳርግቲ ኣልቦ ከበድቲ ገበናት እቲ ውድብ፡ ተጻዊሮም ነብሶም ረሲዖምን በጅዮምን ብቦምባ ኢድን ካላሽንን ታንክታት ጸላኢ ማሪኾም ናጽነት ዘግዘሙና ኢዮም፡፡

ብኣንጻሩ እቶም ኣብ ካልአይ ጉጅለ ዘለው፡ሓለዋ ናይቲ ኣብ ስልጣን ዝነበረ መላኺ ጃንዳ ኮይኖም ንንቑሕን ዝተማህረን ዘስግእን ንናጽነት ሂወቱ ከወፊ ዝተጋደለ ንጹህ ተጋዳላይ፡እናሃደኑ ኣብ ዘስካሕክሕ እስርቤታት ኣእትዮም ዝጭፍጭፉን ዝቐትሉን ዘሕቅቑን ዝነበሩ ኢዮም፡፡ከይሰንከሉ፡ ከይተወግኡ፡ ከይተሓንፈጡ ኣብ እንግዳዓ ጀጋኑ ተሓዚሎም ኣብ ናጽነት ዝኣተዉ ኢዮም፡፡በዚ ድማ 24 ግንቦት 1991 ዓ/ም ብሓደ ፍጹም መላኺ ኢሳይያስ ዝምራሕን ምሉእ ብምሉእ ዝዝወርን ውድብ’ዩ ናጽነት ኤርትራ ዝተረጋገጸ፡፡ ላዕለዋይ መሪሕነት እቲ ውድብ ይኹን ሓፋሽ ተጋዳላይ ህዝባዊ ግንባር ነቲ መላኺ  ጉጅለ ክቋጻጸረሉ ዝኽእል ባይታ ይኹን ልጓም ኣይነበሮን፡፡

እዚ ኣብ በረኻታት ሳሕል፡ጫካታት ሰሜናዊ ባሕሪ፡ዓድታት ደቡብ፡ ኣብ ጎላጉል ባርካን ደንካልያን ካልእ ቦታታት ኤርትራን ብጉልባብ ቅንዕቲ ውድብ ክሳውዲ ጀጋኑ ተጋደልቲ እናሰየፈ ዝመጸ ሓደገኛ ማፍያዊ ጉጅለ፡ ኣብ ናጽነት ኢዱ ተሓጺቡ ከም ርግበ ሰለሙን ሰለማዊ ክኸውን ትጽበዮ ኣይኮነን፡፡እቲ ምንታይ ዝቦቐለሉን ዝዓበየሉን ዝተኻሕነሉን ግናይ ዓማጺ ስነሓሳብ፡ንስልጣንካ ዝጻረርን ዝደፍርን ቅተል እሰር ጨፍጭፍ ስለ ዝኾነ፡፡የግዳስ እቲ ናይ በረኻ ናይ ጸላም ከደኖ እከይ ተግባራቱ ኣሰራቱ እናረአናዮ እናተነግረና ብኸቢድ ጽምኣት ናጽነት ጻሓይ ምስ በረቐ ውን ልጓም ከይንሕዝ ንዝተፈጥሩ ነቓዓት ከይ ንጥቀመሎም ዳግማይ ተደናጊርና፡፡ኣደንቋሪ ናይ ሓሶት ፕሮፖጋንዳ እዚ ዓማጺ ስርዓት ነቲ ጸርዩ ዘይጸረየ ስግኣታትና ናይ ከበባ ኲናትን፡ ደግሲ ወራር ኢትዮጲያን ኣብ ጸቢብነት ዝተሰረተ ኣጉል ትምክሕትናን ከም ልቡ ንኽምዝምዞ ባብ ኣርሒናሉ፡፡ኣብዚ በዓቲ’ዚ ተዓቝቡ ንኽሃጥር ንኽስውድ እሩሩ….. ኢልና ኣሐንቂቕናዮ፡፡ ከም ምስላ ሓሰኻ ደምበ ናብ ዝለምለመሉ እናሶለኸ ድማ፡ንልቢ መላእ ህዝቢ ኤርትራ ንዕስራን ሓደን ዓመታት ብበሊሕ ሽኻል ኣሸኻኻት ዓለም ተጻዊትሉ፡፡ንሕድሕድና ተጠራጠርትን ዘይንተኣማመንን ከም ንኸውን ገይሩና፡፡ ብዘይትግበሩ ናይ ሕልሚ መብጽዓታትን ሚዛን ክንቲት ዝኾኑ ፈኸራታትን ጓይላን ዳንኬራን ሕሉፍ ፈንጠዝያን ዕስራን ሓደን ዓመታት ኣስኪሩና፡፡

ሎሚ ግን ኣይከም ትማልን ቅድሚ ትማልን፡፡ስሑል ካራ ዝጨበጠ ኣእዳው ውጹዕ ህዝቢ ኤርትራ ኣብ ጎሮርኡ ተተኺሉ ኣሎ፡፡እቲ ሕጂ ዝገብሮ ዘሎ ፈርገጥገጥ ከኣ፡ ከም ነገር ሰፋሕፋሕ ዝብል ወጠጦ ናይ ዓቕሊ ጽበት ኢዩ፡፡ ከምቲ ቀዲመ ዝበልኩዎ እዚ ዓማጺ ስርዓት ሞይቱ ተኣውዩሉ ኢዩ፡፡እዚ ድግስ እዚ ድማ ናይ መጠረሽቶኦም ኢዩ፡፡ ካልኣይ ክፋል ይቕጽል፡፡

ዘልኣለማዊ ዝኽሪ ንሰማእታትና

ሚኪኤል እምባየ(ኣራንቺ)

Aranchi03@yahoo.com

****

መግዛእታዊ ሓይሊ ካብ መሬት ሃገርና ተባሪሩ ድሕሪ ምዉጽኡ ኣብዘን ዝሓለፋ ክልተ ዕቑዳት (Decades) ኣብ ፖለቲካ ሃገርና ዝተዓዘብናዮ ሓድሽ ነገር እንተ ደኣ ሃልዩ ምድያብ ኢሳያስ ናብ ስልጣን ፕረዚደንትነትን ምቕያር መጸዉዒ ስም ናይቲ ስልጣን ብሒቱ ዘሎ ፖለቲካዊ ዉድብን ጥራይ እዩ። እቲ ዋና ጸሓፊ ዝበሃል ዝነበረ ፕረዚደንት ተሰይሙ። እቲ ህዝባዊ ግንባር ሓርነት ኤርትራ ዝበሃል ዝነበረ ዉድብ ድማ ነቲ ብሃረርታ ጽምኢ ሓርነት ተሳቕዩ ዝነበረ ህዝቢ ከዳህልል ንስሙ ናብ ህዝባዊ ግንባር ንደሞክራሲን ፍትሒን ቀይርዎ። ግዝያዊ መንግስቲ ኤርትራ ዝነበረ ድማ ብመንግስቲ ኤርትራ ተተኪኡ።

ይኹን እምበር እቲ ኣብ ጽባሕ ግዝኣታዊ ሓርነት ኣብ ሓዳስ ሃገር ዝተተኽለ መንግስቲ ኣብ መትከል ፍትሒን ማዕርነትን ኣሚኑ ንመሰል፡ ምርጫን ስልጣንን ህዝቢ ከኽብርን ካብ ኣሉታዊ ተመኩሮ ብዙሓት ሃገራት ኣፍሪቃ ክመሃርን ትጽቢት እናተገብረሉ ከሎ ኣብ ምድልዳልን ምብሓትን ስልጣን ብምትኳር ኣንጻር እቲ ክምርሓሉ እየ ኢሉ ቃል ዝኣተወሉ ፍትሒን ደሞክራሲን ኲናት ኣዊጁ።

ብቐደሙ’ዉን ህዝቢ ኤርትራ ባህጊ ናጽነት ዓዚዝዎ ኣየቃለበሉን ጸኒሑ እምበር፡ መሪሕነት “ህዝባዊ” ግንባር ካብቲ ኣብ ሰዉራ ኤርትራ ዝተቐልቀለሉ ፈለማ 70ታት ኣትሒዙ ብናይ ኢ-ደሞክራስያዊ ኣካይዳኡ ዝፍለጥ ጉጅለ እዩ። ስለዚ ድማ ስልጣን ሓዳስ ሃገር ምስ ተረከበ፡ በቲ ካብ በረኻ ሒዝዎ ዝመጸ ዉህሉል ናይ ምዕፋን ተመኩሮኡ ተሓጊዙ፡ ኣብ ኤርትራ ንዘመነ ስታሊን ናይ ሩስያ ዘዘኻኽር ምልካዊ ስርዓት ክተክል ብዙሕ ኣይተጸገመን። ንህዝቢ መሰል-ኣልቦ ገይሩ፡ ወናኒ ፍጹምን ሓታቲ ዘይብሉን ስልጣን ክኸዉን ግዜ ኣይወሰደን። ህዝቢ ኤርትራ እምበኣር፡ “ሓርነትካ ቅበጻ” ዝብል ዘይወግዓዊ ኣዋጅ ዝተኣወጀሉ ካብቲ ግዜ’ቲ ጀሚሩ እዩ።

ህዝብና ኣብ ፈቖዶ ዱር በረኻ ምስ ተመነ-ዕንቅርቢት ተመሓዝዩ፡ ጥሜትን ዕርቃንን ተጻዊሩ ናይ ናጽነት ቃልሲ ከካይድ ከሎ  ዝነበሮ ባህጊ፡ ሓዳስ ሃገር ምምጻእ ጥራይ ዘይኮነ እንተላይ ፍትሒን ደሞክራሲን ላዕለዋይ ኢድ ዝሕዘላ ሃገር ምምስራት እዩ ነይሩ። ስርዓት ኢሳያስ ግን ንድምር ቃልሲ ወለዶታት ኤርትራ ጨዉዩ ስልጣን ምብሓቱ ከይኣክል፡ ንናይ ሓደ ዘመን ራእይ ህዝብና ከም ግመ ወጋሕታ ኣብኒኑ መቐጸልታ ኢድ ባዕዳዊ መግዛእቲ ኮይኑ። እቲ ካብ በረኻን ስደትን ናብ ዓዱ ተመሊሱ ጸሓዩ ከብርቕ፡ ዝዓነወት ቤቱ ክሃንጽ፡ ናብራኡ ከቃንዕ፡ ብፍትሒ ክመሓደርን ሃገሩ ከልምዕን ተመንዩ ዝነበረ ህዝብና ድማ ንትምኒቱ ኣብ ናይ ቋሕ ሰም ግዜ ርእዩ ስኢንዎ።

ህዝብና፡ ኣብ ገዛእ ሃገሩ ሰሪሑ ዝዕንገለሉ፡ ደቁ ኣዕብዩ ንቑም-ነገር ዘብቅዓሉን ናብራኡ ብሰላም ዝመርሓሉን ሃዋሁ ጥራይ ኣይኮነን ሓሪምዎ። ካብቲ ባዕዳዉያን ገዛእቲ ዘዉረዱሉ ግፍዒ ብዘይፍለ ኣገባብ’ዉን እዩ ዉርደትን ሓሳረ መከራን ዝቕበል ዘሎ። ሃገር ብምልእታ ናብ ዓባይ ቤት ማእሰርቲ ተቐይራ ብምህላዋ፡ ስዉር ሕልናዊን ኣካላዊን መቕጻዕቲ ኣብ ዝካየደለን ማእከላት ኣብ ልዕሊ ዜጋታትና ዝፍጸም ዘሎ ኣሰቃቒ መርመራ፡ ካብቲ ብዙሕ ዘይተነግረሉ ግፍዒታት ስርዓት ኢሳያስ እዩ። “ፍትሒ ይንገስ፡ ምልኪ ይፍረስ” ኢሎም ብዓዉታ ድምጾም ኣበሪኾም ስለዘስምዑ ጥራይ ኣብ ቀይዲ ኣትዮም፡ ገጽ መጋብኣያ ከይረኣዩ ብዘይ ፍርዲ ደረት ንዘይብሉ እዋን ኣብ መዳጎኒ መዓስከራት ዕድሚኦም ዘብልዩ፡ ዝሞቱን ስቅያት ዝቕበሉን ዘለዉ ወገናትና ኣሽሓት እዮም።

“ፍትሒ ናይ ምርግጋጽ ዕማም ተዋሂብወን ኣብ ዝተመስረታ” ትካላት ዝረአ ናይ ሰበይ ሰብካ፡ ጉቦ፡ ሃይማኖታዊን ወገናዊን ኣሰራርሓ፡ መቀሓሓሪ ህዝቢን መናዉሒ ዕምሪ ስልጣንን እንተኾነ ተባሂሉ ያኢ ብመደብ ብስቕታ ይሕለፍ ኣሎ። ዓንዲ ማእከል ስርዓተ-ፍትሒ ሃገርና ክኸዉን ዝተነድፈ ሕገ-መንግስቲ ጅሆ ተታሒዙ ኣሎ። ከም ሳዕቤኑ ድማ ዝተፈላለዩ መሰላት ከም ሓሳብካ ብናጻ  ምግላጽ፡ ናይ ምዉዳብ፡ ናይ ምንቅስቓስን ናጻ ኣምልኾን መሰላት ምስቲ ሕገ-መንግስቲ ኣብ ቤት ጽሕፈት ኢሳያስ ተቘሊፎም ኣለዉ። ኣድማሳዊ ተቐባልነት ዘለዎም ከም ፓርላመንታዊ ደሞክራሲ፡ ናጻ ፕረስ፡ ግዝኣተ ሕጊ፡ ተሓታትነትን ግሉጽነትን ዝኣመሰሉ መትከላት፡ ስርዓት ኢሳያስ ክሰምዖም ከሎ ዘባህርርዎ ኣምራት እዮም።

ካብቲ ዘሕዝን፡ ሃገርና ክሳብ ሕጂ ካብ መጽሓፍቲ ሕጊ ሃጸይ ሃይለስላሰ ከም ዘለዎ ተወሪሱ “መሰጋገሪ ሕጊ” ብዝተሰምየ ናይ መሳፍንቲ ሕጊ ትመሓደር ምህላዋ እዩ። ካብኡ ሓሊፉ ድማ ከከም ስምዒትን ኣተሓሳስባን ወተሃደራዊን ሲቪላዊን ሰበስልጣናት ንመዓልቲ ሸዉዓተ ኣዋጃት ዝእወጀላ ሃገር ኮይና ኣላ። ኣብ ኤርትራ ምዕሩይን ርትዓዊን ስርዓተ-ፍትሒ ክትከል ኣይተደልየን። ሃገርና፡ ካብ ዘይተጻሕፈ ሕጊ ተገላጊላ ምስቲ ዝኸተመትሉ መትከላት ኣድማሳዊ ኣዋጅ ሰብኣዊ መሰላት ዝሳነ ናተይ እትብሎ ስርዓተ-ሕጊ ክህልዋ ኣይተፈቕደላን። ጉዳይ እሱራት ፖለቲካ ኣብ ክፉትን ናጻን መጋብኣያ ከም ዝረአ ኣይተገብረን። ፖለቲካዊ ስርዓት ሃገርና፡ ንህላወ ካልኦት ዉድባት ከም ዝጻወር ኮይኑ ኣይተሃንጸን። ስርዓት ኢሳያስ ካብ ጌጋታት በጋሚዶኣዊ ፖሊሲታቱ ተማሂሩ ኣብ ዞባና ካብ ዝፍጽሞም ዘለዉ ወተሃደራዊን ፖለቲካዊን ዕንደራታት ክቑጠብ ኣይከኣለን። እዚ ስርዓት’ዚ፡ ኣይኮነን ን21 ዓመት ንሓንቲ መዓልቲ’ዉን ኣብ ስልጣን ንኽጸንሕ ናይ ምዉሳን ስልጣን ክህልዎ ዝግባእ ህዝቢ ኤርትራ ክነሱ፡ እዚ ስልጣን’ዚ ዋንነቱ ናይ ህዝቢ ክኸዉን ኣይተደልየን።

ስርዓት ህግደፍ፡ ነቲ ካብ ጽባሕ መሬታዊ ሓርነት ሃገርና ጀሚሩ ኣብ ዉሽጢ ሃገር ክኽተሎ ዝጸንሐ በጋሚዶኣዊ ኣካይዳ፡ ኣብ ናይ ወጻኢ ፖሊሲኡ’ዉን ብግብሪ ክጥቀመሉ ጸኒሑን ኣሎን። ኣብ ሰላምን ሰናይ ጉርብትናን ብዘይኣምን ናይ ወጻኢ ፖሊሲ ስርዓት ኢሳያስ ዝተሳቐያ ሃገራት ዞባና ብዙሓት እየን። ኣደራዕ ናይቲ ዉጽኢት ዓንዳሪ ፖሊሲ ዝኾነ ተግባራት መን’ዩ ዝስከሞ እንተ ደኣ ኢልና ድማ፡ ብሓፈሻ መላእ ህዝቢ ኤርትራ ፡ ብፍላይ ድማ መንእሰያት እዮም። መንእሰያት ኤርትራ፡ ሕልምታቶምን ባህግታቶምን ሰዊኦም ኣገልገልቲ ናይዚ ስርዓት ክኾኑ በቲ ስርዓት ዝተፈርዱ ምዃኖም ከይኣክል፡ እቲ ስርዓት እናሓለፈ ኣብ ዝዉልዖ ግጭታት ገንሸላት ክኾኑ ጸኒሖምን ኣለውን። እዚ ስርዓት’ዚ እምበኣር ዕድመን ዕድላትን መንእሰያትና እናተቐለበ እዩ 21 ዓመቱ ረጊጹ ዘሎ።

ከም ዝዝከር፡ ኣብ መጀመርያ ወርሒ ዝሓለፈ ዓመት፡ ሓደ መሓመድ ቦዓዚዝ ዝተባህለ ቱኒዝያዊ መንእሰይ፡ ስርዓት ቢን ዓሊ ኣብታ ሃገር ብዝፈጠሮ ብልሽዉ  ምሕደራን ሽቕለት-ኣልቦነትን ተበሳጭዩ ነብሱ ብምቅጻል ዝጀመሮ ተቓዉሞ፡ ናብ ገዚፍ ህዝባዊ ናይ ተቓዉሞ ማዕበል ኣምሪሑ፡ ናብ መላእ ሰሜን ኣፍሪቃን ማእከላይ ምብራቕን ብምልሓሙ፡ ኣርባዕተ ስርዓታት ንኽቕየሩ ምኽንያት ኮይኑስ ክሳብ ሕጂ’ዉን ይቕጽል ኣሎ። እቲ፡ ስርዓታት ቢን ዓሊ፡ ሑስኒ ሙባረክ፡ ሙዓመር ቓዛፊን ዓሊ ዓብደላ ሳልሕን ካብ ስልጣኖም ንኽግለፉ ምኽንያት ዝኾነ ምረት ቱኒዝያዊ መንእሰይ ብብዙሕ መለክዒታት ካብ ምረት ኤርትራዉያን መንእሰያት እንተዘይዉሒዱ ኣይበዝሕን እዩ። ኣብ ርእሲኡ ድማ እዞም ብንፋስ ለዉጢ ካብ ዙፋኖም ዝተዓልዉ ኣርባዕተ ስርዓታት ተደሚሮም ብባርባራዉነቶም ንስርዓት ኢሳያስ ኣይዳረግዎን እዮም። ስለዚ እምበኣር፡ ስቓይና ካብ ስቓይ ካልኦት ህዝብታት ዝዛይድ ካብ ኮነ፡ ካልኦት ህዝብታት ፈቲኖም ዝተዓወቱሉ ሜላ ተቓዉሞ ተጠቒምካ፡ ዕምሪ ስልጣን ናይዚ ኣረሜናዊ ስርዓት ምሕጻር እዋናዊን ይጽንሓለይ ዘየድልዮን ጉዳይና ክኸዉን ይግባእ።

ኣማኑኤል ማህደረ

(iamamanuel@yahoo.com)

In an interview with VOA’s English to Africa service on Friday, President Afewerki said his government is not interested in keeping people from expressing their views.

But he says he will do what is necessary to “protect national security” in the face of what he calls “external aggression” by those who take money from outside governments to create chaos and spread misinformation.

“This is not a matter of freedom of expression. This is a matter of sabotage – organized sabotage by individuals hired by intelligence agencies from outside,” said Mr. Afewerki, “We’ve even ignored some of these individuals, who have been working with foreign governments, taking money providing distorted information about the reality here.”

Earlier this month, the Committee to Protect Journalists listed Eritrea as the most restricted country in the world for journalists. In its annual survey, CPJ referred to the east African nation as “completely closed” to foreign journalists, saying only tightly controlled state media are allowed to operate there.

It also said journalists suspected of sending information outside the country have been thrown into prison without charge and are often held for extended periods of time without access to family or a lawyer.

In his wide ranging interview with VOA, President Afewerki said he has succeeded in building up Eritrea’s infrastructure and decreasing its reliance on foreign aid in the nearly 20 years since he came to power in the impoverished country.

Mr. Afewerki, who has ruled Eritrea since 1993, said he is more interested in building up his country than embracing what he called the “so-called” tenets of democracy.

http://blogs.voanews.com/breaking-news/2012/05/18/eritrea-president-denies-stifling-freedom-of-speech/

ቅድሚ ዕስራን ሓደን ዓመት ከምዚ ዘሎናዮ ወቅቲ ከም ህዝቢ ሓደ ንዓለም ክትኣምኖ ዘጸግም መስተንክራዊ ዓወት ተጎናጺፍና። ኣብ ምዕራፋት ካብ’ቲ ንፍትሒ ዝተካየደ ቃልሲታት ድማ ሓደ ገጽ ኣብ ማህደር ታሪኽ ክንስንድ በቂዕና። እወ  እዚ ውሑድ ህዝቢ ነቲ ኩሉ ሓያልን ፈታኒ እዋናት ሰጊሩ፡ መዳርግቲ ኣልቦ መስዋእትን ከርተትን ማእሰርትን መግረፍትን ስደትን ከም ጽዋእ ተቅቢሊ’ዩ ነዛ ዓለም ትእምርቲ  ቅያ ዘበሰራ።

ህዝቢ ኤርትራ ነዚ ንምዕዋት ሕሉቡን ንጽፉን እንተላይ እቶም ዝፈትዎም ውልዱ ገንሽል መስዋእቲ ዝበጀዎም  ዕላማ ራእይን ስለዝነበሮ ኢዩ። እዚ ድማ ዝኮነ ዓይነት ምልክን  መግዛእትን ሓንሳብን ንሓዋሩን ካብ ገጽ መሬት ክጽረግ፡ ድሕሪ ደጊም ኣብ ልዕሊ ህዝቢ ኤርትራ ዝኮነ ግዳማዊ ይኩን ብዓል ቤታዊ ተጽዕኖን ባርነትን ክይህሉን ኢዩ።

እንተኮነ ዕጫና ግዲ ኮይኑ እቲ ቅድሚ ዕስራን ሓደን ዓመታት ብጓይላን ደበላን ዝተቅበልናያ ቅርጫት ናጽነት ኣብ ውሽጣን ከምቲ ዝብሃግናያን ዝተመነያን መኣዲ ፍትሕን ዲሞክራስን ዘይኮነትስ፡ የግዳስ ቅርጫት ምልክን ዓመጽን ድኣ ኮነት። እንሆ ድማ ፍርያታ ካብ ዓይንና ዝተኸወለ ኣይኮነን። ንድሕሪት ቁሩብ ተመሊስና ምስ ንምልከት ጎዕዞ ዝሓለፈ  ዓመታት ካብ ምትካል ሓዳስ ብንዴራን ሓዲሽ መንግስትን ዝራኣናዮ ሓድሽ ነገር ሓደ’ዃ  የሎን። እምበሺ ካብቲ ባዕዳውያን ግዛአቲ ኢ/ያ ሃለስላስን ንዕኡ ዝተክኤ ደርግን ዝኸፍእ በደልን ዓመጽን መግዛእትን ባርነትን ኣብ ዝባን ህዝቢ ኤርትራ ተጻዒኑ ንረክቦ። ንልቦና ዘለዎ ኣርሒቁ ንዝርኢ ቀጻልነት ህዝብን ሃገርን ኤርትራ ኣብ ሓደጋ ይወድቅ ኣሎ። ኤርትራዊ ሃገራዊ ወኒን፡ መንነትን፡ ክብርታትን ይዓኑን የበርስን ምህላው ከኣ  ካብ  ኩላና ዝተሰወረ ኣይኮነን። ኤርትራ ድማ ከም ሃገር በዚ መዕገቲ ዝይተረክቦ ስደትን ሞትን ጥፍኣትን መንእሰያት ትጸንት ኣላ። ጎበዝን ጎርዞን ዘይብሉ፡ ዓዲ ዝርከብን ሕድሪ ዘጽንዕን ዘይብላ ሃገር ቀጻልነታ ክሳብ ክንደይ ምዃኑ ርዱእ ኢዩ።

ሰለዚ ነዚ ከጽንተና፡ ከም ኣብዲ ድሕረይ ዳንዴር ትብቆላ ዝጭሩሕኡ ስርዓት፡ ካብ ማይ-ቤቱ ሓሊፉ ካልእ ዘይዓጅቦ ሓንሳብን ንሓዋሩን ከብቅዕ፡ ሎሚ ከምቲ ናይ ትማሊ ብሓባር ሓሕ፡ እምቢ እምብላይ ንምልኪ ንበል።

ዎ ! ዝከበርካ ህዝቢ ኤርትራ ተልዓል ! እቲ ትማሊ ነቶም ከጽንቱካ ዝተሃንደዱ ባዕዳውያን ብዓጸፋ መልሲ ዝመልሽካ፡  ኣላሽ ዘበልካዮም ፡ ሎሚ ንምንታ’ዩ ስቅታ ዝመረጽካ ? ውለድካ እንዳ ጽነቱ፡ እንዳካ እንዳፈረሰ፡ ዓደቦካ ብወሑዳት ሰብ መስል ተዃሉ እንዳ ዓነወ ። እታ ብዕጸምቲ ደቅካን የሕዋትካን ኣሓትካን ኣብ ከውሒ ጅግነት ዝተሃንጸት ሃገር ቀጻልነታ ሓደጋ እንዳ ወደቀ፡ እቲ ምእንቲ ብዙሓት ዝተከፈለ መወዳድርቲ ኣልቦ ዋጋ፡  ብውሑዳት ጠላማት ተጨውዩ  እንዳርእካ፡  ከምዘይ ርኣካ፡ ኣውያት ሓዘንን ውጹዓት እንዳሰማዕካ ከምዝይሰማዕካ ትም ሕትም ኣይግድን። ኣይፋልካን። እቲ ምንታይ’ሲ ሞሳ መስዋእቲ ደቂኻ ነዚ ኣይነበረን፡ ዓስቢ ከርተትካን ስደትካን ማእሰርትካን፡  ዳግማይ ማእሰርትን ሞትን ከርተትን ኣውያንትን ሓዘንን ኣይኮነን። እቲ ዓስቢን ጻማን ጀጋኑ ካብ ተኮልፍ ሕጅውን ምርጫና ቃልሲ ኢዩ። ዕስራን ሓደን  ዓመታት ዕንደራን፡ ብድዔ፡ ዓመጸ፡ ኩናት፡ ምክልባትን ራዕድን ይኣክል።

ዎ ! ዝከበርካ ኣብ ውሽጢ ዓድን ኣብ ስደትን ዘሎካ መንእሰይ ኤርትራ !  ኣብዚ ዝሓለፈ ዕስራን ሓደን ዓመታት መላእ ህዝቢ ኤርትራ’ዃ እንተይዘጠዓሞ፡ እቲ ከም ሕሱም ዝሳቀ ዘሎስ ንስካ/ ንስኪ መንእስይ እኪ/ እካ። ብስም ሃገራዊ ኣገልግሎት ኣብ ኩናት ትጥበስ፡  ብስም ሃገራዊ ልምዓት ብዘይ መስልን ደሞዝን ክብርን ብጥራይ ዝባንካ፡ ሰብ ምዃንካ ረሲዖም ናብ ዝዝረብ መጽዓኛ ክተከውን ዝተፈረድካ ንስኻ ዶ ኣይኮንካን። ብዕባራ ምኽንያት ምኹብላል ዶ፡ ሰግረ ዶ ተባሂሉ ኣብ ኣደባባይ ክትርሸን፡  ኣብ ጎዳጉዲ ሽላታትን ብዝስኻኽሕ ስቅያት ክትማስን፡ ክትመውት ዝገብረ ህግደፍ እዩ  ። ንሳቶም ነጋውስን ሽሞኛታትን ኮይኖም ንስካ ከም ባርያ ብነጻ ጉልበትካ ርሻውንቶም ክትሃንጸ፡ ግራውቶም ክትሓርንስ ክትዓጽድን በገዳድ ዝተዓስከርካን ትዕስከር ዘሎካን  ንስኻ  እካ ?  እታ ከም ገረድ ዘመነ መሳፍንቲ፡ መግቢ መዃንንቲ ህግደፍ እትሰርሕ፡ ቡን እተፍልሕ፡ ክዳወንቶ እትሓጽብ፡ ብዘይ ድሌታ ብሓይሊ እንትዕመጽ ዘላ እታ ጎርዞ ግምጃ ሃገር ሓፍትኻ ወይ ሓፍትኪ ዶ ኣይኮነትን ?  ንራእካ ከም ቆጽሊ ክረግፍ ዝገበሩን ፡ ብዕድሜ ንእሰነትካ ዝተጣልዑን፡ ግራት ዓደቦ ኳኺቶ ዘሪኦም መርግጺ ክትስእን፡ ንስደት ሃጽ ኢልካ ክትጠፍእ፡ ኣብ መድረበዳ ክትጥሕል፡ ኣብ ባሕሪ ክጥሕል፡ ክብርና ተጋሂሱ ከም ዋና ዘይብለን ጥሪት፡ኣብ ፈቀዶ በረኻታት ሲናይ ከም ጠለ በጊዕ ክትሕረድ፡ ንኣዳም ገረሞ ናዊቲ ኣካላትካ ከም ኣቅሓ መሻጣ ኣብ ዕዳጋ ክውርድ እንዳረኣክ እንዳሰማዕካ ስቅታ ፡ ሓረግ ወሎዶታት ተበቲኹ  ዓደቦኻ እንዳፍረሰ ንምታይ ትም ትብል ?

ሰለዚ መንሰይ ወለዶ ተልዓል ! ንመስልካን መስል ህዝብካን ተዓጠቅ። ኣብዛ ንነብረላ ዘሎና ዓለም መስተንክር ዝሰርሕ መንእሰይ ኢዩ። ልዕሊ ኩሉን ዝያዱ ኩሉን ድማ ኣብዛ ንነብረላ ዘሎና ዓለም ተገዲዱ እንተዘይኮይኑ፡ መሰልካ ዝፈልጠልካን ዝህበካን ሓደ’ዃ  የልቦን። እቲ ናይ ትማሊ ምስተንኪራዊ ቅያ እዃ ህያው ኣብነት እንተኮነ፡ እዚ ኣብ ጎረባብትና ዝርኣናዮ ዓበይቲ ዓወታት መንእሰያት ቱንዝያን ግብጸን፡ ኣብ ጥምጥም ዘሎው መንእሰያት  ሶርያን የመንን ንዓና መንእሰያት ኤርትራ ሓደ ዓቢ ተሞክሮ ናይ ግዜና ኢዩ። ሽግርናን መከራናን ካብ ጎረባብትን ዓለምን ዝብኣሰ ክንሱ፡ ጌና ኣብ ስቅታ ሪዕምና ንርከብ ኣሎና። ሰለዚ እቲ ግዜ ከይሓለፈ፡ እቲ መሬት ከይ መሰየ ብኣግኡ ንተንሰእ።  ነቲ ኣብ ከባቢኡ ተፈጢሩ ዘሎ ውደባታት ብምልፋን ውደበና ናብ ዝለዓለ ደረጅኡ ከነበርኾ ሎሚ ንወስን። ኣብ ሓደ ዕላማን ራእይን ንዕሰል። ሓቀኛ ዓወት ብንጹር መስመርን ንጹር መትከልን’ዩ ዝረጋገጽ።

ምእንትዚ ከም ዓለም-ለኻዊ ምንቅስቃስ መንእሰያት ኤርትራ ነዚ ኣብ ኩርናዓት ዓለም፡ ካብ ሰሜን ኣሜሪካ ክሳብ ኣውስትራልያ፡ ካብ ኣውሮጳ ክስብ ኣፍሪቃን ማእከላይ ምብራቅን  ብመንእሰያት ደላይቲ ፍትሕን ሓርነትን ተወሲዱ ዘሎ ተበግሶን ሰለማዊ ስልፍታት ነሞግስ። ዕውቱን ውጺእታውን ኽኽውን ክኣ ግድና ክንጻወት ከም ወትሩ ድልዋት ኣሎና። ብቀንዱ በዚ ኣጋጣሚ ንኩሉ ደላይ ፍትሒ ተቃላሳይ ሓርነት ብፍላይ ከኣ መንእሰይ ኣብ ዝሃለው ይሃሉ ነዚ ሃገራዊ ጻዊዒት ብምልኣት ክሳተፎ፡ ኤርትራዊ ግቡኡ ክገብር ጻዊዕትና ነቅርብ።

ሓርነት ግድን ኢዩ።

ዘልኣለማዊ ክብርን ሞጎስን ንጀጋኑ ስማእታትና።

ዓለም-ለካዊ ምንቅስቃስ መንእሰያት ኤርትራ

15 ግንቦት 2011